Dag 47, etappe 42. 24 km, 34945 steg.

Det er ein nytelse å gå her i Galicia. Ingen endelause sletter med åkrar så langt auget rekk. Her er det opp og ned, fjell og dalar, og flott utsikt. Mange små pueblos som ligg tett i tett. Nokre stadar har ein ikkje gått ut av ein før ein entrar ein ny. Og vi kan legge i veg om morgonen i nokolunde trygg forvissing om at der vil vere ein bar open rin stad, der ein kan kjøpe kaffi og litt mat. Her er så grønt og frodig, masse å ta bilete av, og 2 mil på vegen går som ein leik.

Godt team på vegen. For ei glede for meg det har vore å gå i lag med Jian og Jaeik frå Sør-Korea, og dei siste dagane også med Laureano. Han er galiser, og vi har nytt godt av at han kan galisisk, samt at han har fortalt mykje om landet sitt. Vi har vore fæle til å knabbe frukt i vegkanten, frå kirsebær, til eple og pærer, sjølv om dei har vore sure. Vi er litt gor tidleg ute, druene langs vegen treng nokre veker til, diverre.

No er vi i Deseiro, og det gjenstår berre 10,5 km, som skal gjerast unna i ein fei i morgon.

Eg gler meg til å gå inn i Santiago. Det blir ei oppleving. Hugh frå Australia, som eg gjekk i lag med i ei veke, til Mérida, har sendt melding om at vi må møtast der i morgon for ein drink. Veldig hyggeleg. Gler meg til å treffe han igjen.

Det har vore lite kvinner på denne Caminoen. Har møtt nokre få, og dei har som regel gått saman med nokon. Så skulle eg ha selskap på vegen, så har det vore å slå følge med menn. Dei har vore hyggeleg følge, og eg har fått vener for livet! Ofte, som einaste kvinne på mange Albergue, så har eg fått ha toalett og dusj for meg sjølv, og det har jo vore herleg. Kvaliteten på Albergua har også gått opp sidan sist, då eg gjekk 1/3 av Camino Francés i 2011.

Her i Deseiro bur vi på Albergue Reina Lupa. Veldig bra plass. Vi har gjort unna siste klevask, og ete ein veldig god middag, saman med ein ire som også bur her.

Santiago neste, og siste❤️

Dag 46, etappe 41, 23km. Steg: 34406.

Nærmar oss mål!

Vakker dag, men veldig kaldt dei første timane. Kald vind, men klart og fint.

Nydeleg landskap, og flott underlag, det meste. Gjennom skog, og over ei gammal bru, frå 950 e.Kr. Brua har “overlevd” både jordskjelv og krigar, den var viktig for samferdsla i Galicia.

Hadde planlagt frukost undervegs ganske kjapt, men når barane ikkje opnar før kl 9, må vi berre gå vidare. Fann til slutt ein som var open.

Ankomst Albergue i Bandeira kl 13. Flott kjøken, m.a., men utan noko utstyr! Dette fordi vi skal heller gå ut og ete middag, i staden for å lage middag sjølv…….

I morgon ventar Deseiro. Nest siste etappe👍🏻

Dag 45, etappe 40. 29 km. Steg: 41013

Tidleg opp i dag, 5.30. Lang vandring i dag.

Verendring til kjølegare ver, perfekt for vandring.

Variert landskap frå tett, nesten urskog, til opnare landskap. Ei bra stigning i starten, og litt opp og ned heile vegen.

Stoppa etter 4-5 km for frukost.

Ein stopp seinare i Dozón, for café con leche, før vi gjorde unna siste del til Botos. Merkeleg kva det betyr å kunne dele opp vandringa med ein stopp eller to undervegs. Det kjennest så mykje kortare å gå.

Innsjekking på Hostal, med luksus av eit nydeleg, vanleg handklede til dusjen. Lunsj på hostalet = tre rettar inkl. drikke (12€)= middag for meg👍🏻😊 Vårt gode «team» på fire inviterte med ein ire som vi traff undervegs. Han var lukkeleg, første personane han hadde snakka med sidan han forlot Ourense.

I morgon ventar Bandeira, 23k.

Dag 44, etappe 39. 24 km. 35614 steg.

Frukost i byen før start. No er det blitt litt luksus. Her i Galicia er det mange små byar undervegs, med mulegheit for å stoppe for mat og kaffi. Vi treng ikkje ha ned nødrasjonar, eller frukt. Det lettar sekken litt😊

Forlet byen Ourense over den vakre romerske brua over elva Miño. Ganske bratt stigning opp i ca 900 m høgde, litt som å gå på Hafstadfjellet. Heldigvis var dette før det blei veldig varmt.

Stopp undervegs, til kaffi og brød med kvitost og det typiske spanske syltetøyet, membrillo.

Ankomst Cea og Alberguet her i 15-tida.

Blei invitert på koreansk middag med mine vener derfrå, saman med vår galisiske camino-ven. Utruleg hyggeleg, og nydeleg mat. Kor heldig eg er som får møte slike flotte folk! Vener for livet🙏🏻

I morgon – Botos. Lang vandring, 29 km. Tidleg opp😮‍💨

Dag 43, etappe 38. 22,1 km, 32679 steg.

Start i overskya ver /litt skodde, noko som er vanleg her. Blei etterkvart sol og varmt. Ein god del på asfalt, noko som ofte er slik når ein nærmar seg ein storby.

Herleg å vandre forbi små pueblos, der det er opne barar, og høve til å kjøpe ein café con leche, eller frukost med tostada. Vi blir så lette å glede😂

Mange stopp på vegen for å ete plommer, epler og pærer. Også pasjonsfrukt smakte vi på😋

Ankom Ourense kl 14. Flott Albergue, nytt og fint, Xunta-Albergue.

Dagens sjokolade var å møte Sunna igjen. Lang og god ettermiddag i lag med henne, etter at ho var med oss camino-vener å ete middag. Ho har bestemt seg for at ho ikkje blir med på dei siste fem etappane, av helsemessige grunnar. Veldig synd, synst eg, men helsa først. Og vi kan gjere ein annan Camino i lag seinare.

Veldig varmt i dag. 30 grader.

5 etappar att. I morgon ventar Cea.

Dag 42, etappe 37. 21,7 km, steg: 30261

Vakna til skodde i dag, og overskya det meste av dagen sjølv om meldingane var sol. Men deileg vandrever.

Vi var 4 på vegen, ein galisier, dei to sør- koreanarane og meg, og vi hadde stor nytte av kunnskapen til vår nye ven frå Galicia.

Eit særmerke med Galicia er alle hórreos, små hus som har blitt, og framleis blir, brukt til å lagre/oppbevare korn og mat i løpet av vinteren. Dei er typiske her, desse små husa. Veggane har sprinkler, som sørger for god ventilasjon. Nokre slike «hus» har ein kors på taket. Kvifor? Kanskje for å sørge for velsigning av grøda? Liknar litt på våre stabbur, og står på ein slags pælar for å hindre mus å komme inn (slik våre stabbur gjorde).

Vi har også sett mange gamle «vaskestasjonar», som var viktige møteplasser for kvinnene – å komme saman, vaske klede, og utveksle siste nytt av diverse sladder😊

Frukostpause undervegs i Vilar de Barrio. Slike kjekke avbrekk gjer til at etappen verkar kortare.

Flott natur, nedstigning frå Albergueria, gjennom veldig gammal eikeskog på siste del.

Vi merkar at vi er i Galicia. Dei syner stor omsorg for pilgrimane. Dei har benkar undervegs, mange vannpostar med frisk, kaldt vatn, og merkinga er fantastisk.

I tillegg har dei offentlege Alberguer av ypperste klasse, til berre 8€ for ei seng.

Jian og Jaeik inviterte på «middag» på kvelden. Triveleg selskap. Dette måtte berre bli «the chocolate of the day»👍🏻

I morgon, Ourense, 22,1 km.

Dag 41, etappe 36. 26,6 km. Steg: 39007. Søndag 25.juni.

For ein dag! Forlot Alberguet kl 7. Nydeleg ver, gode Caminovener på vegen, låg an til å bli ei perfekt etappe. Fortsatt er vi i fjella søraust i Galicia. Og i dag har det vore ei slik ned og opp- etappe.

Etter 6 km passerte vi As Eiras, og der venta litt av ei overrasking: dekka opp i ein koseleg krok i vegkanten, med kaker, kaffi, nøtter, honning, juice,…. Dette var verkeleg «the chocolate of the day». Utruleg kjekt, og rørande omsorgsfullt av dei som gjer dette som honnør til pilgrimar. Gratis, men dei tek mot gåver for å kunne halde fram med dette. Vi gav raust.

Vidare på vegen – kaffi og tostada i Laza, før vegen vidare til Albergueria.

Skikkeleg stigning opp frå ca 450 moh til over 900.

Nydeleg natur, men skikkeleg varmt på slutten.

Ankom Albergueria på ettermiddagen. Koseleg fjellandsby. Her bur 17 fastbuande. Ein bar som blir styrt av den same personen som driv herberget her: Albergue El Rincón del Peregrino. Kjent for sine skjell som folk har hengt opp sidan 2004. Litt weird, men får trøyste meg med at det er mange gode ønsker formidla på desse skjella😊 Så vil tru eg vil sove godt.

I morgon Xunqueira, 21,7 km.

Dag 40, etappe 35. 20,2 km. 29345 steg.

Ingen frukostservice, trekker tilbake alle kompliment til gårdsdagens bar! Men vi har lært etter kvart, og har nødproviant på lur. Laurdagar og søndagar er ei mare «her nede»😅

Blei gledeleg overraska ved start i dag, då vi såg merkestein med til km att. Gårsdagens tal gjalt ei anna løype/camino. Vi har no litt mindre enn 18 mil att! Neste søndag – Santiago, om alt går som planlagt👍🏻

Dagens etappe har berre vore fantastisk! Vi er i høgda, og det er visst sjeldan at ein har flott utsikt og klarver. Men vi fekk det! Så heldig eg eigentleg har vore med veret. Høyrer frå folk som går nokre dagar lenger framme, at dei har hatt mykje meir regn enn det eg har hatt.

Ja, vi er i høgda, 1000-1300 i løpet av etappen, vil eg tru. Fantastisk ver, litt bris her i høgda, men frå kl 11 blei det bra varmt. Små plassar undervegs, då eg tenkte at her skulle ein tru at ingen kunne bu. Og smal bilveg, utan rekkverk, og hundrevis av meter rett nedover…. Eg hadde ALDRI køyrt bil her, hadde forlanga å gå ut😂😅

Fantastisk utsikt, og på slutten nokre triste felt med skogbrannherja tre frå i fjor.

I morgon er planen å gå til Albergueria ca 24,5km

Dag 39, etappe 34. 24,6 km. Steg: 36895. Start kl 7, også i dag i følge med mine koreanske vener. Kor heldig eg er!

Også i dag ein del stigning, før vi kom opp på etappa sitt høgaste punkt, grensa til Galicia.

Endeleg i er vi komt hit! Her er det så fint og frodig, og stor forandring på merkinga av Caminoen. I tillegg verkar stien å vere preparert mykje betre dei fleste plassar. Er spent på om det blir slik heilt til Santiago. Herberga her i Galicia er kalla Xunta Albergues, og er styrt av regjeringa her. Her er det verkeleg skikkeleg standard. Verkeleg ein forskjell frå dei to førre, der vi ikkje ein gong fekk madrass- eller putedekke!

Fekk eit lite sjokk når vi kom til grensa til Galicia. Då viste det seg at vi hadde ikkje 21 mil att, slik eg trudde, men 24… Kjendest som når ein spelar brettspel, og ein må ta tre steg tilbake😂 Det er jo ei lang dagsetappe i forskjell😅

Vi er fortsatt i høgda, A Gudiña ligg på 978 moh. Kom hit ca kl 13.

Dagens vandring i strålande sol, har vore heilt fantastisk. Så variert! Nydelege stiar, med unntak av nokre våte delar. Vakker natur, frå skog, fjell og opne vidder. Gjennom mange koselege, små landsbyar. I tillegg til meg og mitt turfølge, har vi hatt god kontakt med dei fire spanske søstrene, og to spanske menn. Til saman 10 nokolunde samla som gjekk denne etappen i dag.

Å gå slik, frå stad til stad, er ein unik måte å sjå mest mogeleg. Ein kjem tett innpå folk og daglegliv, i høve korleis det hadde vore å komne hit med bil. Eg synst det er fantastisk.

I morgon er vi lova frukost på ein bar her, kl 6.30. Og dei gjorde det kun for oss, sa dei❤️ Snakk om service🙏🏻

Dag 38, etappe 33. 18,9 km. Steg: 28058.

Folk her er så høflege. Dei ein møter på, helsar ein med Buenos días eller Buenas Tardes, eller berre “Buenos/Buenas”, fordi dei ikkje gidd seie begge orda? Men har registrert at det etter kvart har blitt meir og meir vanleg også her, å seie «Hola» (hei). Når ein sit og et, og nokon går forbi, så seier alle «Que aproveche!» (nyt/ nyt maten!)

Hadde ei grei natt på Albergue municipal, men reagerer på at det ikkje er obligatorisk av hygieniske omsyn, å dele ut laken og putevar. Dette er andre gangen eg opplever at dette ikkje blir handheva. Dei fleste plassar inkluderer dei dette i prisen for å bu. På Alberguet budde det 4 spanske søstre, ein spansk mann, mine to koreanske vener, Jian og Jey, i tillegg til meg. Vi avtalte å stå opp kl 6, alle, så vi slapp å ta omsyn, og kunne «bråke» og slå på lyset.

Det har vore ein fantastisk vandredag. Gjekk etter dei gule pilene i lag med Jian og Jey, dei andre gjekk bilvegen. Turen gjekk gjennom frodig natur, mykje bjørkeskog, faktisk, og eikeskog. Og det har vore sildrande bekkar overalt. Minte meg veldig om heime, her eg gjekk. Rennande vatn har eg ikkje sett mykje av så langt på turen. Men no er vi i høgda. Starta på 991, gjennom eit pass til 1363 (som er denne Caminoen ditt høgaste punkt) og så ned til Lubián, på 1020. Det merkast at vi er i fjella. Kjølegare både på dag- og nattestid.

Stoppa halvveges i Padornelo og åt frukost, på Bar Silva, solid bocadillo med salchichón. Muy rico👍🏻 Frustrerande å ikkje kunne kjøpe med seg nokre av godsakene i restauranten.

Gjekk gjennom ein nydeleg liten pueblo, Aciberos, før vi til slutt var framme i Lubián.

Overnatting på Hostal Casa Mariana. Måtte ha litt luksus i form av kvite handkle og ei god seng.

I morgon ventar A Gudiña, 978 moh.