Fredag 11.oktober

Dag 35, etappe 31

51127 steg, 33 km. 

Fantastisk morgon, med frukost på ein serveringsstad langs vegen, etter eit par km. 

Flatt landskap i 700m høgde, etappen minte meg om etappane i Castilla La Mancha, med eviglange vidder og lite variasjon. 

To kaffi- og matstopp undervegs, siste i San Vincente del Palacio. 

Siste 8-9 km parallelt med motorvegen inn til Medina del Campo. 

Då fekk eg regnet på meg, når 2 km att. 

Kom fram til Medina litt før 5. 

Lang etappe, er rett og slett sliten. Hovudet er fullt av bomull, kjennest det ut som, etter dårleg søvn førre natt. 

Innlosjering på alberguet her, eit tidlegare kloster. 

Kvar sitt rom. Med handklede👏🏻 og sengetøy!

Her i Medina må vi bestemme oss for om vi skal ta Camino Levante til Benavente eller Sureste (dei går litt saman, nokre stadar). Vi har hamna på Sureste, der er lengda på etappane mest sympatiske i høve såre bein. 

Så i morgon ventar Tordesillas, 24 km. Og det er meldt regn.

Torsdag 10.oktober

Dag 34, etappe 30. 

39516 steg, ca 29 km. 

8 grader ved start kl 6.40. Mørkt, avhengig av hovudlykt når ein startar så tidleg. 

Stjerneklar, vakker morgon.

Det har vore kjøleg haustver i heile dag, men sola varma godt etter kvart. Ingen regn i dag heller, lurer på om vi har flaks, eller om det kjem veltande innover oss frå Galicia snart, hjelp! 

Vi har bevega oss ute i “huttiheita” i dag. Ikkje mykje liv og røre, mange av ungdomane flyttar ut, og dei eldre blir att, slik som i Norge. Dei to første stadane vi kom innom i morgontimane, hadde ingen bar open før kl 10. Men til slutt fekk vi oss kaffi og frukost i Tiñosillos. 

Fram til Tiñosillos gjekk vi gjennom flatt landskap med hausta åkrar, så langt auget rakk. 

Etter denne byen gjekk vi gjennom furuskog. Heilt fantastisk å gå her, på sti med fin sand. Kilometer etter kilometer, rett og slett nydeleg! 

Nesten alle trea var utstyrt med “bøtter” for utvinning av kvae. 

Ankom Arévalo halv tre, ein halv time før vi hadde kalkulert. 

Bur på Albergue donativo, og vi har fått selskap av ein irsk syklist, som kjem motsatt veg, frå Santiago til Valencia. 

Heldigvis er det to rom på herberget😉. I har begynt å bli bortskjemde med å vere åleine på overnattingsstadane. 

I morgon er det 34,4 km til Medina del Campo.

Det går vel bra, det også👍🏻

Fleire glimt:

Onsdag 9.oktober

Dag 33, etappe 29

33847 steg, ca 26 km. 

Frukost på herberget, Isabella laga scrambled eggs og kaffi. Heldige meg❤️

Kl 06.45 starta vi, med lykt. Etter omlag ein time var det lyst. 

Ankom Cardeñosa etter halve distansen, kaffi og spansk tortilla der på ein bar. 

I dag har det vore vindfullt å gå. Men heldigvis ikkje regn. 

Nydeleg etappe, med fine stiar, slik eg hugsar dei frå Castilla y León i fjor. 

Stor variasjon i landskap, og så har vi støtt på kyr undervegs. Meir dyr her enn i Castilla la Mancha. 

Ankom Gotarrendura halv 2. 

931 moh, 167 innbygg.

Ein gudsforlatt plass – om eg kan seie noko slikt i dette gamet. Men utruleg hyggelege og hjelpsame folk.

Her bles vanvittig, trur det må vere stiv kuling. Isabella prøvde henge opp si fyre Patagonia-jakke. Og plutseleg var den vekk! Ut på leiting, eg ut på jordet, inga jakke.

Kanskje hadde den blåst over taket bort til naboen? Vi tok eit sykkelstativ, og kven skulle tru at høgdepysa meg torde klatre opp – i badesko, og kikke ned i patioen til naboen. Der var jakka! No er det berre å håpe at naboen kjem heim i løpet av ettermiddagen🤞🏻😆

Middag her på den einaste baren, kl 16. Ho som møtte oss på baren då vi kom og gav oss nøklar til herberget, har laga nydeleg mat til oss. Ho heiter Maribo, og kjem frå Venezuela.

Fine folk❤️ Og på baren møtte vi naboen, som jobba der. Så då var jakka berga🙏🏻

Her er ingen butikk, eller matbutikk. Men etter 3,7 km i morgon kjem vi til ein plass der vi kan ete frukost. Vi skal klare ein bra distanse i morgon då💪🏻 Då går vi til Arévalo. Ca 28 km. 

PS:

I går fekk eg melding frå Anunciación, kvinna som inviterte meg på kaffi på veg til El Toboso. Ho skulle gå Camino frå Sarria til Santiago. I går var ho framme:

Fleire glimt frå dagen:

Tysdag 8.oktober

Dag 32

Det er ikkje lett å vere i ro når ein har mykje å gjere. 

Har vore på Decathlon (tok buss…) og kjøpt meir ullklede. Det er kaldt her oppe i fjella, og når vi kjem til Galicia kan vi vente oss allslags ver i slutten av månaden. Til og med snø.

Eg har vore på postkontoret og sendt heim klede eg ikkje treng meir her. 

Og eg har vore hos lege (tok buss…) og fått resept på betennelsesdempande medisin. Eg endar vel opp med å bli ekspert på både taping og behandling av denne skiten, skulle klart meg fint utan🤔

Så eg har ikkje fått sjå allverda av denne fine byen. 

Bymuren rundt gamlebyen er frå Middelalderen. Den er over 2,5 km lang rundt, har 87 tårn og 9 portar. Den har 2500 taggar, og muren her er den best bevarte av sitt slag i verda.

Det er Spania sin nasjonaldag, Día de la Hispanidad, 12.oktober. Dagen blir også kalla Columbus-dagen, til minne om at Christoffer Columbus gikk i land på Bahamasøyene 12.oktober 1492.

Dette er generelt ein skulefri dag for ungane, men elles inga feiring blant folk. Offisiell feiring er ei militærparade i Madrid med kongen til stades. Her i byen såg vi stridsvogner oppstilt ved muren i dag, kanskje skal dei ha ei slags markering her også? 

Såg det var spennande for barna å komme opp på desse monstera, ikkje særleg kjekt å sjå, tykte eg.

Det har bore kaldt her, 13 grader, men litt vind i tillegg, 16 grader midt på dag. Overskya. Det er meldt regn i Spania heile veka, då det er spennande dagar vêrmessig. 

I morgon skal vi gå til Gotarrendura.

24 km. 

Måndag 7.oktober

Dag 31, etappe 28. 

40084 steg, 28,8 km

Starta dagen med litt hurtigfrukost på herberget. Ingen bar open på ein måndag… 

Tidleg opp, å gjere seg klar med all taping på leggen/leggane tek si tid😊

I dag var det meldt regn, vi valde å gå bilvegen. Å gå i gjørme var lite freistande. 

Vi gjekk oppover, og høgaste punkt på dagens etappe var omlag 1400 moh. 

Haustfargar i fjellet, og beitande kyr og hestar såg vi undervegs. 

Det gjekk i grunnen greitt å gå på bilvegen. Bilane køyrde forsiktig, ingen kvit midtstripe på denne vegen. 

6-7 km før vi var framme, kom regnet, og det til gangs. Regnet rann frå regnponchoen og ned i skoa, så blei ganske så våt, ja🌧️

Då vi endeleg ankom Ávila, ca 1200 moh, var det 13,5 grader, og vi var iskalde. Men slik er det i dette gamet; vi må ta det som kjem.

Då vi gjekk inn i byen, var det nesten ein time meir med gåing for å komme til herberget, som ligg rett utanfor bymuren mot vest.

Til gjengjeld er det eit veldig bra herberge👍🏻

Klevask (vaskemaskin her) og mat, har vore ettermiddagens syssel her (som vanleg), pluss å tørke sko. 

Kviledag i morgon, eller kort etappe? Det er det vi har grunda på i ettermiddag. Isabella treng kviledag pga smerter under føtene, og eg….. treng det jo, eg og👍🏻 Herberge-verten sa vi kunne vere både to og tre netter meir, om vi hadde behov for det, fordi det er så få pilgrimar no.

Vi har landa på kviledag begge to, og går for det. Så får det stå si prøve i høve vêr og vêrmeldingar dei neste dagane🤞🏻 

Fleire glimt frå dagens etappe:

Søndag 6.oktober

Dag 30, etappe 27

26429 steg, ca. 14,7 km

Vi er bra høgt til fjells, vi har i dag gått frå 750 moh til 1050, men undervegs har vi vore oppe i omlag 1250 moh. 

Begynte etappen med ein time, nesten, bratt stigning. Herleg å kjenne at eg måtte ta i litt. 

Så har det vore litt variert, før vi hadde ei ny oppstigning, og nedover att til San Bartolomé de Pinares. 

Det har vore ei flott etappe, totalt ulikt i går. Vi har vandra gjennom flokkar med beitande kyr, men lurer på kva dei finn å ete, då tørt og lite grønt som er att no på hausten. Vi var litt utrygge på kor kjekke desse kyrne var, men det gjekk fint👍🏻  Men baksida med å gå gjennom beiteland, er alle kyraruer…..

Her veks tre og vekstar langt over den norske tregrensa. 

På vegen i dag var det mange tre som var skada etter skogbrann. 

Vi ankom San Bartolomé kl 14, og fekk nærast sjokk då vi kom til Alberguet, og der var ein annan pilgrim😂 Ein spanjol som går motsett veg, mot Valencia. Han har vore på vegen i fem månader. 

I morgon er planen å gå til Ávila, ca 25 km. Ei tøff etappe, og det er meldt regn heile føremiddagen. Det ser eg føre meg blir ein tøff kombinasjon- opp i nesten 1500 meter, med regn og kyraruer……🤔 Kanskje vi må ta ein del av etappen på bilvegen for å unngå problemet. Vi får sove på det her på herberget 😊 

Og foten? Stadig betre, men vil nok tigge/kjøpe is nokre dagar til. Tapa den andre foten også, for sikkerheits skuld. Han murrar litt, men eg ber han teie seg💪🏻

Fleire glimt:

Laurdag 5.oktober

Dag 29, etappe 26

34981 steg, 23,5 km. 

Etter ei god natt, og frukost som vi laga sjølv på herberget, drog vi avgarde i soloppgangen. 

Nok ein nydeleg dag, stjerneklart, men kaldt såpass tidleg. 

Passerte el “Cruz de Santiago” då vi var komt ut av byen, og begynte nedstigninga.

Denne etappen har vore nedover, bortover og oppover, siste kneiken opp til Cebreros var herleg, godt for ein vestlending å få kjenne på at ein måtte ta i litt, og skikkeleg løyse sveitten😅

Vi har gått gjennom nydeleg landskap også i dag. Ingen stad å stoppe for ein kaffi i dag, men slik er det ofte. 

Ein del gåing på asfalt/bilveg i dag, men også masse i terrenget. 

Hausten har kome her i fjella. 

Vi er no på 750 moh. 

Her i Cebreros er herberget stengt for tida, så i dag deler vi eit rom på hotell, Isabella og eg. 

Vi har forlate regionen Madrid, og gått inn i Castilla y León. 

Undervegs i dag har vi stoppe på “Toros de Guisando”, (oksar frå G.) i El Tiemblo, frå før-romersk tid. Artig avbrekk. 

Elva Albercha går gjennom området vi bevegar oss i, og i dag har Caminoen gått over fleire romerske bruer. Veldig overraskande, så utruleg vakre dei er desse bruene. Eg blir så andektig når eg går over desse bruene, tenkjer på livet dei levde på den tida, og kor utruleg dyktige ingeniørar dei var, romarane. 

Vi har gått i fotspora til desse romarane i dag. Etter den første, lille brua, kom vi til to større, Puente de Valsordo y Santa Justa, ca 3 km frå Cebreros, dei var ei oppleving. Dei kom så overraskande på oss! Wow, to slike fantastiske romerske bruer på vår veg👏🏻 Santa Justa-broen har eitt enkelt spenn. Dette er mykje enklare enn det i brua Valsordo, med fleire spenn, men begge så vakre.  

I morgon går vi kort etappe, ca 15 km, til San Bartolomé de Pinares, 1100 moh, altså ein del stigning. Men godt for beina, og min legg er i ferd med å skikke seg👏🏻

Fleire glimt frå dagens etappe:

Onsdag 2. oktober

Dag 26, etappe 23

25889 steg, 15 km 

Vi sov godt vegg i vegg med kyrkja i natt.

Frukost på bar, før vi la i veg denne vakre morgonen. 

Litt vind i dag, men varmt og deileg. Men det er meldt fare for regn seinare på ettermiddag / kveld. 

Kort etappe i dag, og eg klarte å gå i slow motion, mens Isabella gjekk så fort ho ville. 

Vi møttest på ein bar i ein liten by undervegs, Huesca. 

På vegen gjennom byen, blei eg snakka til av ein mann, han lurte på kvar eg var på veg. Jau, eg skulle møte ei venninne, på ein bar. Var ho sveitsisk? Ja, det var jo rett. Ja, ho er på den baren som låg rett nedi gata, rett fram. Og så måtte eg fortelje kvar eg var frå. 

Isabella fortalde at ho var blitt snakka til av fleire, også. 

Folk er så hyggelege og hjelpsame, og merksame. Eg blir så rørt av all omsorg mange viser. 

På baren blei vi også snakka til av ein vennegjeng. 

Ei av damene der fortalde at i Mellomalderen da pilgrimane møttest på vegen, sa dei ikkje ¡Buen Camino! som i dag. Dei sa «Ultreia». Det er ei slags helsing, for å gi mot og oppmuntring til kvarandre på vegen, eit ønske om å gå vidare, uansett kor vanskeleg vegen måtte verke. 

Vi skal sove på Albergue Parroquial her i Novés, også dette eit donativo. Kunne vore gjort mykje meir ut av dette herberget, m.a. ein grundig vask. Men her fekk vi i det minste laken på senga, og vaskemaskin. 

Novés er ein lite by med vel 2700 innbyggjarar, 573 moh. 

Vegen og landskapet på veg hit i dag, var omlag som i går, med hausta åkrar, vindrueplantasjar, pistasj og oliven. Så langt auget rekk. 

I skrivande stund er det 22 grader, frisk bris frå vest, og eg sit (som vanleg😅) med foten høgt og is. Det går framover🤞🏻👍🏻. Stabukken av ein inflammasjon er i ferd med å gi opp, kan det verke som. I alle fall var dagen i dag oppløftande. Det hjelper å gå korte etappar, og det hjelper med elastisk tape. Trur også det hjelper med stavar, at dei er med på å redusere vekta av sekken på beina. Same kva det er som hjelper, berre det hjelper❤️

I morgon går vegen vidare til Escalona, ca 20 km.